Layihənin yekun tədbiri təşkil olunub
Gəncə Dövlət Universitetində “Dayanıqlı ağıllı şəhərlər, regionlar və yaşıl iqtisadiyyat mərkəzlərinin fəaliyyət mexanizmlərinin gücləndirilməsi” adlı layihənin yekun tədbiri keçirilib. Layihə Avropa İttifaqı tərəfindən maliyyələşdirilib və məqsəd Gəncə Dövlət Universitetində Nizami Gəncəvi adına Ağıllı Dayanıqlı Şəhərlər və Regionlar Mərkəzinin funksional imkanlarının təkmilləşdirilməsi olub. Əvvəlcə mərkəzin idarə heyətinin sədri Pərvin Kərimzadə tədbir iştirakçılarını salamladı və universitetin dayanıqlı inkişaf istiqamətində təşəbbüslərindən danışdı. Daha sonra Aİ-nin Azərbaycandakı nümayəndəliyindən Ülviyyə Abdullayeva mərkəzə hansı növ dəstəklərin ola biləcəyi barədə danışdı. Mərkəzin idarə heyətinin üzvü, Azərbaycan Respublikasının birinci vitse-prezidentinin baş məsləhətçisi cənab Elmar Məmmədov mərkəzin əhəmiyyətindən, mərkəzin yaşıl iqtisadiyyat baxımından şəhərə və ətraf rayonlara nə kimi fayda verə biləcəyindən danışdı. Daha sonra PROSPECT şirkətindən Elias Demian layihə haqqında danışdı. O, bu cür mərkəzlərinin beynəlxalq təcrübəsini və onların siyasətin formalaşdırılması və həyata keçirilməsində əhəmiyyətini qısaca təsvir etdi. Nəhayət, mərkəzin direktoru Vasif Həsənov və mərkəzin direktor müavini Razim Əliyev müvafiq olaraq Ağıllı Dayanıqlı Şəhərlər və Regionlar Mərkəzinin vizyonu və yaşıl transformasiya ilə bağlı çağırışlar və mərkəz ilə işləməyin faydaları haqqında danışdılar.